Амал мерекесіндегі арқан тартысы

Қаражанбастағы спорттық жарыстар тартысты бәсеке мен жарқын жеңістерге толы. Бұл жолы ең мықты және епті мұнайшыларды анықтау үшін арқан тарту және үстел теннисінен жарыс өтті. Осылайша, олар көктемнің басты мерекелері Амал мен Ұлыстың ұлы күнін сергек рухпен және көтеріңкі көңіл-күймен қарсы алды.

Мұнайшылар арқан тарту додасында тартысты ойын көрсетті. Оған әр түрлі цехтан 16 команда қатысты. Кездесулерде команда ойыншылары нық қозғалып, сенімділік танытты. Бұл ұлттық спорт түрі шыдамдылық пен жеңіске деген құштарлықты арттырады.

Нәтижесінде, үздік үштікті жабдықтарды пайдалану және икемдеп жөндеу цехы командасы түйіндеді. Екінші орынға көлік басқармасының жігіттері тұрақтады. Ал №1 мұнай өндіру цехы командасы сайыс чемпионы атанды.

Мұнайшылар үстел теннисін де кәсіби деңгейде ойнайды. Цехтар арасында спортзалға жиі жиналып, шеберліктерін шыңдап жүрген командалар бар. Мерекелік турнирге 20-ға жуық жұмысшы қатысты. Қаражанбастықтар үздік ойын көрсете отырып, мықтыларды анықтады.

Жарыс қорытындысы бойынша үшінші орынды Технологиялық көлік басқармасының жұмысшысы Исладин Байсегізов жеңіп алды. Екінші орынға мердігер компания өкілі Нұрбек Тайтақов жайғасты. Ал Бұрғылау және ұңғымаларды жерасты күрделі жөндеу басқармасының слесарь-жөндеушісі Бекзад Шадкам жарыс жеңімпазы атанды.